( السِّت الوِحْشَه و المِرايه )

بسم الله الرحمن الرحيم

قصة شعبيّة ..

(  السِّت الوِحْشَه و المِرايه )

صلوا على النبي ..

اللهم صلِّ و سلم عليك يا نبي ..

كان فيه هنا إيه ؟

ست وحشه جداً ؛ مجَّوِّزَه راجل حلو جداً ..
كل يوم الصبح قبل ما يخرج يقول لها : إوعي تبصي في المرايه ..
إوعي تبصّي في المرايه !
جات في يوم إيه ؟ 
قالت لنفسها : هوّ ليه بيقول لي : إوعي تبصي في المرايه ؟
طيب أمّا أبص في المرايه !
راحت إيه ؟
بصِّت في المرايه !
قام قالت : يا ساتر يا رب ! دا انا وحشه أوي !! دا انا جوزي حلو أوي ! ما يستاهلش وحده وحشه كده زيّي !!
قامت لمِّتْ هدومها و راحت مشيت !!
أما خرجت من البلد ؛ قابلها واحد حلو جداً ..
قالت له : إيه ده ؟ إنت إيه ؟
قال لها : إنتِ شايفاني ؟؟ أنا شكلي إيه ؟
قالت له : إنتَ حلو خالص زيّ جوزي !
قال لها : أهــو أنـا حـظـك ! إرجعي بيتك و اسمعي كلام جوزك ؛ و ما تبصيش في المرايه تاني أبداً !
راحت رجعت بيتها و سمعت كلام جوزها و عاشت حياتها ..
..............

و توته توته خلصت الحَدّوته حِلوه و الّلا ملتُوتَه ؟ إن كاتْ حلوه عليك غِنوه ، و إن كاتْ ملتوته عليك حدُّوته .
ـــــــــــــــــــــــــــــــــــــــــــــــ

ست : سيدة ، مجوزه : متزوجة ، إوعي : احذري ، تبصي : تنظري ، جات : جاءت ، وحشه : غير جميلة ، أوي : جداً ، ما يستاهلش : لا يستحق ، لمّت : جمعت ، هدومها : ملابسها ، إيه ده : ما هذا ؟ إيه : ماذا ؟ شايفاني : ترينني ، زيّ : مِثل ، خلصت : انتهت ، الحدوته : الحكاية ، و الّلا : أو ، ملتوته : مُعادة و مملة ، كاتْ : كانت ، عليك : مُلزم ، غِنوه : أغنية .