( السِّت الصُّغَيَّرَه )

بسم الله الرحمن الرحيم

قصة شعبية للأطفال ..

( السِّت الصُّغَيَّرَه )

صلوا على النبي ..

كان فيه هنا إيه ؟ ستّ صغَيّره ، و دارها صغيّره ، كل يوم تكنس دارها تلاقي جنيه .. قام جت في يوم و كنست دارها و لقت الجنيه ؛ خدته و راحت اشترت بيه لحمه و طبختها و حطتها تحت اللّقان " الماجور " ..
جه قطّ الجِرَان نطّ على البيت و كل اللحمه ، قام شافته ، راحت خابطاه بالمطرحه قطعت ديله .
قال لها : ادّيني ديلي !
قالت له : لأ !
قام راح اشتكاها للقاضي ..
القاضي بعت لها الغفير خبّط عليها و قال لها : تعالي يا ستّ عند القاضي ..
راحت .. قال لها القاضي : القط دا شاكيكي إنك واخده ديله ؛ تقولي إيه ؟
قالت له اسمع يا حضرة القاضي : صلي على النبي .. قال : عليه الصلاةُ و السلام .. قالت له : أنا ستّ صغَيّره .. قال لها : خِلقة ربكِ ! ، و داري صغيّره .. قال لها : على قدّك ِ! ، كل يوم أكنس داري .. قال لها : نضافه لكِ ! ، ألاقي ميّدي " مصروفي " .. قال لها : رزقكِ ! اشتريت به لحمه .. قال لها : من نِفْسِكِ ! ، قالت له : جِهْ قط الجِران كَلْها ؛ خبطُّه قطعت ديله ! قال لها : حقّك ِ .. حقّك ِ .. حقّك ِ !!
بسّ ! و خرجوا من عند القاضي .
القط أعد يتحايل عليها تدّيله ديله ما رضيتش .. يتحايل عليها قالت له : طيّب ؛ روح هات لي نبقه من الشجره إللي هناك دي و أنا أديك ديلك ..
قال لها : طيب ! ، راح للشجره قال لها يا شجره : تديني نبقه عشان أديها للست و الست تديني ديلي ؟
قالت له : طب روح هات بُقّ ميّه من البحر .
راح للبحر ؛ قال له : يا بحر اديني بُقّ ميّه أديه للشجره عشان تديني نبقه أديها للست و الست تديني ديلي .
قال له : مش ح اديك بُقّ ميّه أللا لما تخلّي الصبايا يغنّوا على شطّي .
راح للصبايا ؛ قال لهم : يا صبايا روحوا غنّوا على البحر ؛ عشان البحر يديني بُقّ ميّه ؛ و البق أديه للشجره ؛ و الشجره تديني نبقه أديها للوليه و الوليه تديني ديلي .
قالوا له : طب روح هات لنا شعره من ديل الحصان اللي هناك ده عشان نروح نغني .
راح للحصان ؛ قال له : يا حصان اديني شعره من ديلك و الشعره أديها للصبايا عشان الصبايا يغنّوا على شط البحر و البحر يديني بق ميه و البق أديه للشجره و الشجره تديني نبقه و النبقه أديها للوليه و الوليه تديني ديلي .
قال له : طب روح هات لي حِزمة برسيم من الجماعه إللي بيضُمّوا في الغيط دول .
راح للجماعه إللي بيضموا في الغيط ؛ و قال لهم : يا جماعه ادوني حِزمة برسيم و الحِزمه أديها للحصان و الحصان يديني شعره و الشعره أديها للصبايا و الصبايا يغنّوا على البحر و البحر يديني بق ميه و بق الميه أديه للشجره و الشجره تديني نبقه و النبقه أديها للوليّه و الوليه تديني ديلي .
قالوا له : طب روح هات لنا الغدا و احنا ندّيك .
راح البيوت و قعد ينادي : يا جماعه ياللي ليكو ناس بيضموا في الغيط ؛ ادوني الغدا أوصله لهم عشان يدوني حزمة برسيم و الحزمه أديها للحصان و الحصان يديني شعره من ديله و الشعره أديها للصبايا و الصبايا يغنّوا على البحر و البحر يديني بق ميه و بق الميه أديه للشجره و الشجره تديني نبقه و النبقه أديها للوليه و الوليه تديني ديلي .
قام راحوا مدِّينو الغدا ؛ راح موصله للجماعه إللي بيضموا في الغيط ؛ راحوا مدينو حزمة برسيم ؛ راح اداها للحصان راح الحصان عاطيه شعره من ديله ؛ راح اداها للصبايا راحوا غنّوا على البحر ؛ راح البحر مديه بق ميه راح يديه للشجره ؛ راحت الشجره مدّياه نبقه ؛ راح ادّاها للوليه و الوليّه ادّته ديله خَدُه و فرح بيه أوي !

و توته توته خلصت الحدوته ؛ حلوه و لّا ملتوته ؟
إن كات حلوه عليكو غنوه ..
و إن كات ملتوته عليكو حدّوته !
ـــــــــــــــــــــــــــــــــــــــــــــــــــــــــــــــ
اللقان ، الماجور : إناء يُعجن فيه ، المطرحه : عصا مُسطّحه يُطرح بها الخبز في الفرن ،جت جه : جاءت جاء ،الجران : الجيران ، خبّط : طرق الباب ،اديني : أعطني ، خبطّه : ضربته ، بعت : بعث ، أعد قعد : أخذ في فعل شيء ، الست الوليّه : السيده المرأة ، الغفير : الحارس ، ميّدي : مصروفي ، يتحايل : يستعطف ، نبقه : النبق ثمر معروف ، طب : طيب ، البحر : النيل في مصر و عند الفلاحين خاصةً يُسمى بحر ، بق ميه : شربة ماء ، يضموا : يجمعون يحصدون ، حِزمة : كمِّية مربوطة ،أوي : قوي جداً ، كات : كانت ، ملتوته : محكِيّة أكثر من مرة .